En Viveiro contamos coas activistas Antonina Semedo, Isabel Vilalba Seivane, Susana Riveira Fernández e Laura Bugalho. En Compostela acompañáronnos Marisela González Ataide, Antonina Semedo, Paz Filgueira e Patricia Porto Paderne.
Coa presenza destas colaboradoras puidemos coñecer o que significou para as mulleres caboverdianas de Burela a unión na asociación Batuko Tabanka, o proxecto da batukada feminista en diferentes puntos xeográficos do país, o establecemento de liderados femininos nos colectivos, a influencia que ten na sociedade a presenza de mulleres no sindicalismo obreiro e labrego, os transfeminismos, a ausencia de perspectiva de xénero na xustiza, a aparición das redes sociais como un instrumento en mans do activismo, a necesidade de referentes femininos para as novas xeracións de rapazas, o asociacionismo relacionado coa saúde das mulleres, e outros temas relacionados coa temática da axenda feminista deste ano.
A Axenda Feminista 2018, que leva por nome Activistas Galegas, conta con 12 activistas que son referentes en Galiza: Nela Abella, Iria Villar, Patricia Porto Paderne, Isabel Vilalba Seivane, Valentina Formoso Gosende, Laura Bugalho, Susana Riveira Fernández, Adriana Casal Rama, Marisela González Ataide, Carmen Vilaboa, Paz Filgueira e Antonina Semedo.
Reflectimos nas páxinas da axenda as loitas no activismo ecoloxista, sindicalista, da saúde das mulleres, activismo cultural, loita local, de transfeminismo, xustiza, de normalización da lingua, activismo no terreo da discapacidade funcional, das mulleres migrantes e de internacionalismo.
O deseño das tapas correu a cargo da deseñadora Abi Castillo.
O día 19 pecharase este ciclo de presentacións na Libraría Bahía de Foz.