Viveiro 23-3-18. O Concello de Viveiro organiza dous Roteiros de Natureza para esta Semana Santa, ao Monumento Natural do Souto da Retorta e á Cova da Doncela, baixo o título “Degusta Viveiro”, cos que se pretende dar a coñecer a natureza, paisaxe e idiosincrasia de Viveiro, mostrando a beleza da ría, os cantís, os restos dos primeiros asentamentos cristianos no seu territorio e un dos eucaliptais máis importantes de Europa, para sorprender e deleitar aos visitantes. Ao rematar a ruta, preto da hora de comer, falaráselles aos participantes da gastronomía local, co fin de que poidan coñecela.
As visitas serán o martes 27 de marzo e o domingo 1 de abril; sairán da oficina de turismo ás 11 h, primeiro visitarase o Souto da Retorta e a continuación a Cova da Doncela. Empregaránse coches particulares ata chegar a Chavín e, dende alí, o percorrido peonil será de 1,9 km. O tempo estimado de duración é de 40 minutos e o obxectivo didáctico do percorrido é dar a coñecer o monumento natural, os soutos, a vexetación de ribeira e as árbores e mais os usos tradicionais.
A continuación, os participantes desprazaranse ao Mirador da Insua para facer o Roteiro da Cova da Doncela, cun percorrido a pé dende o mirador de 2,3 km. Neste tramo do roteiro o obxetivo didáctico é dar a coñecer as minas e os sistemas de transporte dos minerais, a ría de Viveiro, as furnas, os ollos e outras formacións xeolóxicas, a Cova da Doncela e os primeiros eremitorios do cristianismo.