Burela 19-4-18. Este fin de semana, a Policía Local de Burela inicia unha campaña de detección de drogas en condutores de vehículos no centro urbano. Esta proba complementa á de detección alcohólica que se realiza desde hai anos por parte deste Corpo.
Devanditos controis son fundamentais na prevención de accidentes e en mellorar a seguridade viaria. No ano 2017, ao redor do 40% dos falecidos en accidente de tráfico arroxaron resultados positivos en alcol ou algunha droga.
A proba en si consta de duas partes. Un primeiro test indiciario en saliva a través do cal se comproba se existe presenza ou non dalgunha droga ou substancia tóxica, e unha segunda recollida de mostras, tamén saliva, que se remite a un laboratorio homologado no que se analizan un total de 21 substancias, e determina finalmente cales están presentes e a súa concentración .
Ao contrario que nas probas de detección alcohólica, non existe unha taxa para superar, senón que a condución dun vehículo ou bicicleta coa simple presenza no organismo de drogas ou substancias tóxicas presupón a comisión dunha infracción administrativa, cuxa sanción supón unha multa de 1.000€ e a retirada de 6 puntos do permiso de conducir, no seu caso.
Se ademais a presenza destas substancias supón unha influencia na condución, pódese cometer un delito tipificado no art. 379.2 do Código penal, castigado con pena de prisión de 3 a 6 meses, ou multa de 6 a 12 meses, ou traballos en beneficio da comunidade de 31 a 90 días e, en todo caso, a privación do permiso de conducir por un tempo superior a un ano e ata 4 anos.
Os suxeitos obrigados a someterse ás probas de detección de drogas así como as consecuencias da negativa para someterse ás mesmas, son idénticas ás das probas de detección alcohólica.
Desde a Policía Local de Burela agradecen á asociación UGPOL (Unión Galega de Policías Locais) a súa colaboración, achegando o primeiros test así como protocolos de actuación, actas e estatísticos a elaborar na campaña.