Na presentación participaron o concelleiro de Deportes de Viveiro, Emilio Villarmea, e Aitor Freiría e David Villares, adestradores de base e xogadores do primeiro equipo do Balonmán Galipizza Viveiro. O edil alabou o traballo que fan desde o club para organizar o torneo e destacou a axuda que ofrece o Concello a todos estes tipos de actividades “que atraen moitos visitantes á nosa cidade polo que serven para dinamizar a economía local e para promocionar Viveiro”, sinalou.
Pola súa banda, Aitor Freiría explicou que serán un total de 19 os conxuntos que participarán nesta edición, na que debutarán dúas entidades, o Rodeiro dezano e o Ribadesella asturiano. “Así mesmo, de novo volveremos ter connosco aos amigos do OAR Coruña, Balonmán Lucus, Balonmán Lalín e aos avilesinos do Quirinal e o Santo Ángel Bosco”, recordou. Na categoría infantil loitarán 5 conxuntos polo título, na alevín mixta farano un total de 10 e por coroarse campións de benxamín mixto haberá outros 4 conxuntos.
Os encontros darán comezo o venres, día 25 de maio, ás 18 horas e remataron ao redor das 21: 40 horas. A primeira fase do torneo retomarase o sábado, día 26. A xornada matutina será entre as 10:30 e as 13:30 horas, mentres que na sesión vespertina haberá partidos desde as 16 horas ata as 8 e medio da tarde. Os partidos polas medallas terán lugar o domingo, día 27, entre as 10 e as 14:30 horas, sendo posteriormente a entrega de trofeos e recordos a todos os participantes.
Ademais do Concello de Viveiro, co Viveiro de Balonmán colaboran a Deputación de Lugo, o Servizo Provincial de Deportes da Xunta e o grupo Galipizza.