A Pontenova acolle a milleiros de persoas na VII edición da súa proba automobilística

Lugo, 2 de xuño de 2018. O Presidente da Deputación e Alcalde da Pontenova, Darío Campos Conde, deu este sábado o bandeirazo de saída á VII Subida á Pontenova, proba puntuable para o Campionato Galego de Montaña e na que participaron máis de 40 pilotos. A proba conta co principal apoio do Executivo Provincial, cunha achega económica de 7.000 euros dentro da súa aposta por promover o turismo e dinamizar o municipio mariñán. Pola súa parte, o Concello da vila destina outros 4.000 euros a esta cita, unha das máis consolidadas do calendario. O evento reuniu a milleiros de afeccionados, chegados de toda a xeografía galega e das localidades veciñas de Asturias e Castela e León, entre os que se atopan grandes nomes como piloto asturiano, José Antonio López-Fombona.

Campos Conde subliñou “que con esta proba reforzamos a nosa decidida aposta polo deporte do motor como atractivo turístico que impulsa e dinamiza a economía, así como a vida das vilas lucenses. Por este motivo, dende o Goberno da Deputación mantemos un firme compromiso co automobilismo e, proba disto, é o noso apoio incondicional ás probas que se organizan por excelencia en toda a provincia”.

Percorrido
A Escudaría Pontenova organiza os días 2 e 3 de xuño, a VII edición da Subida a Pontenova, puntuable para os Campionatos e Trofeos de Galicia de Rallyes, Copa Propulsión Carcross e Copa Pirelli de Montaña.

A proba está centralizada na localidade de Pontenova, coas verificacións o sábado día 2 pola mañá e as primeiras mangas de competición pola tarde. O tramo de subida está localizada na estrada LU-4803, entre os puntos quilométricos 0.45 e 5.25, con 4,8 kms de lonxitude, cun formato de 6 pasadas, dúas de adestramento e 4 oficiais segundo o programa.