O Goberno da Pontenova aproba bonificacións dun 95% no IBI de explotacións agrarias, do que se beneficiarán preto de 100 gandeiros

A Pontenova, 7 de xuño de 2018. O Alcalde da Pontenova, Darío Campos Conde, informou que o Pleno Municipal aprobou por unanimidade, a proposta do Goberno para reducir nun 95% o Imposto de Ben Inmobles -IBI- das explotacións agrícolas e gandeiras do municipio, do que se beneficiarán preto de 100 pequenos e grandes gandeiros e agricultores. Na Pontenova, o tipo de gravame para os bens inmobles de natureza rústica é do 0,65%, e contará cunha redución do 95%, tal e como informou o rexedor municipal.

O Rexedor municipal destacou que “se trata dunha medida que beneficiará a preto de un cento de explotacións agrarias e gandeiras que hai no concello pontenovés, aforrando custes aos propietarios destas explotacións, que son os que xeran riqueza e crean emprego no noso Concello”.

Campos Conde apuntou que “o que buscamos con esta medida é promover a actividade económica do noso Concello, fundamentalmente a do ámbito rural, facendo unha redución importante aos veciños nos impostos das actividades relacionadas co sector primario e coa actividade agrogandeira, o piar fundamental da economía do noso Concello”.