Trátase da rehabilitación dun tramo de 150 metros da beirarrúa da fachada traseira do Seminario de Mondoñedo onde se están a substituír as tubaxes da rede de abastecemento de auga potable e a rede de sumidoiros; ademais de colocar plaquetas e construír unha gabia de 30 centímetros por onde discorran as augas pluviais ata a rede de sumidoiros.
A alcaldesa, Elena Candia, asegura que “con esta intervención se renovan as tubaxes e os servizos de abastecemento e recollida de augas”. Tamén destaca a popular que “este tipo de melloras contribúen a mellorar a imaxe da cidade”.
Esta actuación, que conta cun investimento de 22.000 euros por parte da Xunta de Galicia, rematará en dúas semanas. Posteriormente, tamén se procederá á colocación de protectores para os colectores do lixo.