Lugo, 27 de agosto de 2018.- A Vicepresidencia e Consellería de Presidencia, Administracións Públicas e Xustiza destinou unha achega de 72.245 euros ao financiamento do servizo de mantemento de espazos naturais dos concellos de Trabada e Lourenzá.
O delegado territorial, José Manuel Balseiro, subliñou que mediante esta subvención sufragaranse, por unha banda, gastos de funcionamento dos servizos municipais dedicados á protección do medio ambiente e dos espazos naturais e, por outra, a adquisición de equipamento de protección ambiental para os dous concellos mariñáns.
Este apoio económico concédese a través da liña competitiva de subvencións do Fondo de Compensación Ambiental e permitirá contribuír ao financiamento de gastos de funcionamento propios destes servizos, tales como os gastos de persoal e os de mantemento dos tractores empregados no desbroce e limpeza de vías.
Asimesmo, está previsto financiar a instalación de diversos contedores para a recollida selectiva de papel e cartón, vidro, residuos sólidos urbanos e envases, ademais de soportes para a suxeición de contedores. O proxecto contempla tamén a construción de soleiras de formigón.
O delegado territorial destacou a utilidade do Fondo de Compensación Ambiental para avanzar na protección da calidade medioambiental e a sustentabilidade do territorio. A Xunta destina os ingresos derivados do canon a actuacións encamiñadas á conservación, reposición e restauración do medio.