O delegado territorial da Xunta en Lugo, José Manuel Balseiro, explicou que esta iniciativa desenvolverase a través dunha achega ao Concello de 13.617 euros, de xeito que a Administración local percibirá integramente a totalidade do importe subvencionable e asumirá unicamente o IVE.
O proxecto contempla actuacións de desmontaxe manual de acumulacións de pedras que proliferaron froito da acción humana dando lugar a elementos semellantes a “milladoiros”, figuras antropomorfas ou “batolitos”, e a redistribución das rochas apiladas para tratar de devolverlle á zona a súa configuración orixinal.
Outras das accións previstas son a eliminación de lixo disperso acumulado no entorno e o arrincado manual de especies herbáceas invasoras.
A iniciativa completarase coa colocación de seis paneis divulgativos sobre os valores albergados neste enclave, que incluirán información relativa ás normas de comportamento que deben seguir os visitantes cando accedan a un espazo protexido destas características.
Balseiro precisou que esta actuación enmárcase nunha orde de axudas da Consellería de Medio Ambiente e Ordenación do Territorio que ten como obxectivo o financiamento de proxectos encamiñados a restaurar, preservar e mellorar espazos incluídos na Rede Natura 2000.
As actuacións executaranse nas anualidades 2018 e 2019, segundo o previsto na convocatoria. Os beneficiarios das subvencións son tanto concellos como titulares de terreos forestais e agrícolas situados nestes espazos protexidos, así como asociacións ambientalistas e de custodia do territorio con terras agrícolas situadas en áreas elixibles.