No mes de xullo superáronse as 1200 visitas nas xornadas ordinarias de apertura da oficina de turismo e as 2300 visitas durante a xornada do sábado do XX Mercado Medieval. O rexistro de xullo acadou un total de 3562 visitantes procedentes principalmente de Galicia, Madrid, Castela e León e Asturias. Cabendo destacar tamén a afluencia de andaluces, cataláns e vascos. En canto aos visitantes internacionais, recibíronse visitas dende Alemaña, Bélxica, Brasil, Francia, Holanda, Irlanda, Italia, Polonia, Portugal, Reino Unido e Rumania.
No mes de agosto o patrón de procedencias foi moi similar e rexistráronse un total de 2315 visitantes en xornadas ordinarias de apertura da oficina de turismo.
Por outra banda, cabe destacar a afluencia de visitantes que tiveron as distintas actividades que axudaron a dinamizar o entorno do Castelo durante a época estival, ademáis da XX edición do Mercado Medieval, como foron o concerto de saxofón, a I Baixada de Carrilanas, o III Maratón de Pintura e a V edición do Teatro no Castelo.
Actualmente, o Castelo do Castro de Ouro permanece aberto de martes a domingo de 11 a 14 e de 17 a 20 horas ata o domingo 16 de setembro. Dende esta data poderá visitarse sábados, domingos e festivos de 11 a 14 e de 16 a 19 horas.
