Durante toda a fin de semana, Xermade converterase no centro do torneado artesanal da madeira, onde cada ano acoden profesionais non só de toda Galicia senón do resto de España e de Europa. Esta nova edición ofreceralle aos profesionais e afeccionados do oficio un espazo no que poder expoñer, contrastar, aprender e interrelacionarse. No programa de actividades atópanse demostracións de profesionais de prestixio internacional como a francesa Elisabeth Mezières, especialista no torneado en verde de madeiras locais para conseguir efectos durante o secado das pezas; o británico Rod Page, especializado no torneado de pezas ocas; o madrileño Toni Porto, escultor vocacional da madeira; e Lolo Castro, mestre galego no traballo da llerga, unha ferramenta propia da zona que el mesmo forxa, tempera e afía.
O programa de actividades complétase coa exposición itinerante de madeira torneada CONtornos. Ademais, durante os tres días, os visitantes poderán ver unha mostra de pezas torneadas achegadas polos participantes, así como un espazo de venda de maquinaria, ferramentas e publicacións relacionadas co oficio. O XVIII Encontro Internacional de Torneiros da Madeira celébrase no polideportivo municipal de Xermade en horario de 10:30 a 14:00 e de 16:00 a 19:30h o venres e o sábado, e de 10:30 a 13:00 h, o domingo. O programa completo pódese consultar na páxina web do evento.