Este permiso previo era imprescindible para acometer estes traballos xa que afectan á zona da servidume de protección do dominio público marítimo terrestre, na que están emprazadas estas instalacións deportivas.
O Viveiro Club de Fútbol conta xa con todos os permisos administrativos autonómicos para levar adiante unhas melloras que se acometerán co financiamento íntegro da Xunta de Galicia, a través da Secretaría Xeral para o Deporte.
En concreto, a achega autonómica permitirá a dotación de rego automático ao campo de Cantarrana, co correspondente levantamento do tepe e colocación de tubaxes, aspersores, electro válvulas e as conexións eléctricas necesarias para o seu correcto funcionamento.
Así como tamén outras melloras en equipamentos, en particular, a autorización cita a colocación de dúas porterías de fútbol trasladables e reposición de varanda de protección nos laterais das gradas para mellor seguridade dos afeccionados.
A Xunta colaborará co Viveiro Club de Fútbol a través da achega de 40.000 euros, avanzada durante unha visita do delegado territorial, José Manuel Balseiro, ás instalacións e tras reunirse coa directiva desta entidade deportiva.
O Viveiro Club de Fútbol dispón na actualidade dun equipo competindo na liga rexional preferente e de distintos equipos en categorías inferiores, algúns en competicións autonómicas. Ademais está a piques de celebrar o seu centenario