Lourenzá acolleu unha nova edición da “Ruta da Faba”

Lourenzá 27-10-18. O val de Lourenzá acolleu este sábado unha nova edición da Ruta “da Faba”, unha actividade ideada pola Cooperativa Terras da Mariña xunto co Pazo e Forno de Tovar, coa colaboración da Mancomunidade de A Mariña Lucense, para poñer en valor o patrimonio, a natureza e a gastronomía de Lourenzá, destacando sobre todo a importancia da faba e o seu cultivo nestas terras.
A ruta, organizada pola empresa Mariñactiva, reuniu un grupo dunhas 10 persoas desde primeira hora da mañá ata media tarde que, acompañados dun guía, visitaron os principais monumentos do patrimonio artísitico local: Mosteiro e Igrexa de San Salvador, Museo de Arte Sacro e Pazo de Tovar.
Tamén visitaron o Centro de Interpretación da Faba, a área recreativa de Muíño do Pereiro, as parroquias de San Tomé e San Adriano, o Mirador da Valiña, as prantacións de faba e a cooperativa Terras da Mariña.
No Pazo de Tovar degustaron un menú no que a faba foi a protagonista, acompañada doutros produtos gastronómicos da comarca, como a pescada de Celeiro e o bonito de Burela.