Na cata de Goente téñense en conta nunha primeira fase os parámetros fisioquímicos, melisopalinolóxicos e sensoriais do mel. Posteriormente, o panel de catadores somete as mostras participantes aos seus sentidos co fin de escoller o mel merecedor deste recoñecemento, atendendo basicamente a unha análise visual, aromática, de sabor e sensación na boca. O resultado para a categoría de meles escuros, na derradeira fase á que unicamente accederon nove das mostras presentadas, foi de 73,4 puntos para o gañador e de 69,2 para o finalista. Este último resultou ser o viveirense Mel O Castelo.
Loli Lage é a herdeira dunha tradición entre abellas moi arraigada na súa familia. O seu mel, comercializado baixo o selo O Castelo, prodúcese tanto nas colmeas que posúe na parroquia de Galdo (Viveiro) como nas que ten no concello de Muras.
Mel O Castelo xa logrou no ano 2015 o segundo premio entre os meles claros, así como unha mención especial polo seu mel escuro de breixo. O produto de Loli Lage tamén conseguiu ser o gañador no 2016 tanto na categoría de mel claro como na de mel escuro, sendo esta a primeira vez na que un mesmo apicultor acumulaba os dous máximos galardóns da cata. E no 2017 volveu quedar como finalista na categoría de meles claros, de novo, cun néctar monofloral de eucalipto.
Este ano o maior inimigo do mel foi a meteoroloxía. A produción sufriu unha importante merma debido ao breve periodo de floración que provocou a inestabilidade do tempo. Aínda así, esta medalla de prata na categoría de meles escuros demostra que é moi difícil chegar, pero aínda máis complicado é manterse. Así e todo, despois de cinco edicións recibindo o recoñecemento deste prestixioso concurso, semella evidente que a calidade de Mel O Castelo non é flor dun día.