Así, o conselleiro, que estivo acompañado polo director da Axencia Galega da Calidade Agroalimentaria (Agacal), Manuel Rodríguez, e polo delegado da Xunta en Lugo, José Manuel Balseiro, tamén destacou que Lugo é a provincia máis beneficiada por estas achegas ao facerse co 45% do orzamento. En concreto, dos 57,2 millóns de euros aprobados a través desta orde de axudas para toda Galicia, uns 26 millóns de euros foron a parar á provincia de Lugo.
No que se refire á incorporación de mozos, todas as solicitudes que cumprían os requisitos nesta liña foron admitidas e aprobadas, ata 194 en total. Así, 6 millóns de euros foron para os mozos que se incorporaron a explotacións da provincia de Lugo. A esta cifra, aclarou o conselleiro, súmanse os 18 millóns de euros para realizar investimentos nas empresas e así facelas máis competitivas (plans de mellora). Estas achegas beneficiaron a máis de 318 profesionais. E por último, no relativo ás pequenas explotacións de Lugo, ata 98 pequenas empresas do agro recibiron preto 1,5 millóns de euros.
Cabe recordar que esta é unha das ordes de axudas máis destacadas da Consellería do Medio Rural, xa que consegue mellorar a estrutura produtiva das explotacións e avanzar na consecución dunha adecuada dimensión e un correcto equilibrio dos seus factores de produción co obxectivo de mellorar a competitividade. Ao mesmo tempo, coa liña de mozos, búscase un rexuvenecemento da poboación activa rural e o fomento do emprego no agro, con especial consideración cara as mulleres, co fin último de fixar poboación no medio rural.