Na Atención Especializada coa recente ampliación temos máis metros cadrados pero non máis e mellores servizos. Operacións que antes se facían no hospital da costa agora se derivan sistematicamente a Lugo ou Coruña. A implantación de marcapasos e cambios de pila dos mesmos a Lugo, operación de xeonllos a Lugo, prematuros a Lugo, as operación de fimose en nenos á Coruña, a ausencia dunha resonancia nuclear magnética fixa, etcétera… Con estas derivacións ben ao HULA ben a clínicas privadas o principio básico de unha sanidade de proximidade na nosa comarca salta polos aires.
E se isto pasa na atención especializada o que pasa na atención primaria non é menos grave. A ausencia de profesionais sen substituír converteuse no habitual, e a precariedade na contratación (nas poucas ocasións nas que se contrata alguén) é a norma xeral. Non se pode prestar unha asistencia sanitaria de calidade cando os profesionais teñen que asumir o traballo propio e o de compañeiros que non son substituídos.
O problema de pediatría na atención primaria tamén é moi grave ao deixar sen atención a nenas e nenos pola ausencia xustificada da pediatra de familia, no momento en que esta solicite un permiso , vacacións ou curse baixa médica, todos eles dereitos fundamentais das traballadoras e traballadores.
Por iso animamos a as traballadoras/es e á veciñanza en xeral a volver a Compostela a berrar nunha soa voz que queremos unha sanidade pública de calidade e de proximidade.
Lembrar que dende CIG Saúde A Mariña poñeremos autobuses gratuítos para as traballadoras e traballadores. Vémonos o 10!
