López Izquierdo sinalou que “a través desta xuntanza, poñemos en común as necesidades das asociacións de alzheimer da provincia. Dende o Goberno da Deputación amosamos a nosa sensibilización polas persoas que padecen esta patoloxía e tratamos de solucionar a falta de financiamento por parte da Xunta”.
Así mesmo, a Deputada destacou que “dentro da nosa aposta por unha Deputación social, rural e coas persoas poñemos o noso gran de area con todos os colectivos sociais que atenden a preto de 200 usuarios na provincia e as súas familias. Facémolo mediante unha importante achega económica para que reciban atención profesional, estimulación cognitiva, psicomotriz ou sensorial, obradoiros de memoria e traballos de linguaxe, co fin de mellorar a calidade de vida dos pacientes e as súas familias”.
As cinco asociacións de alzheimer da provincia atenden a preto de 200 usuarios: 95 en AFA-Lugo; 22 en AFA-Monforte; 45 en AFA-Chantada; 24 en AFA-Viveiro e 10 en AFAN-Burela. As actividades que realizan diríxense á estimulación cognitiva e psicomotriz para tratar de frear a dexeneración dos pacientes que padecen esta patoloxía. Coa a axuda dos equipos de profesionais formados por traballadores sociais, psicólogos, coidadores ou fisioterapeutas, entre outros; realizan obradoiros de memoria, ximnasia, talleres terapéuticos ou neuropsicoloxía individual, ademais de prestar asesoramento ás familias.