En defensa dos intereses dos veciños da provincia, os socialistas lucenses reclaman a dotación de 10 policías, 2 oficiais e 5 subinspectores na Comisaría Provincial de Lugo, así como a implantación dunha Unidade de Prevención e Reacción (UPR). Lugo é a única provincia galega que non conta con esta unidade.
Santos Ramos explicou que “trasladamos a nosa preocupación aos compañeiros no Ministerio do Interior e na Delegación do Goberno sobre a situación actual na Comisaría Provincial de Lugo. Este venres, terá lugar unha reunión entre a Dirección Xeral de Policía e os sindicatos lucenses para analizar o borrador e poder subsanar o déficit de efectivos policiais na provincia de Lugo. Necesitamos máis persoal de Policía na Provincia de Lugo para seguir mellorando na seguridade dos cidadáns e poidamos seguir sendo unha das provincias máis seguras de toda España”.
“Outra das demandas que dende o PSOE sempre reclamamos para a provincia de Lugo é a creación e dotación dunha UPR, como no resto de provincias galegas, para paliar a falta de efectivos e poder atender con garantías eventos como o Arde Lucus, o Resurrection Fest, o Caudal Fest, partidos do C.B. Breogán ou do C.D. Lugo, entre outras” subliñou o Secretario Provincial.
Proposta na Deputación
O PSOE presentou unha moción ao Pleno da Deputación cos seguintes acordos:
1.- Rexeitar a proposta de borrador do “Concurso de Méritos 2019” no que á Comisaría Provincial de Lugo non se lle asigna ningunha praza e insta á Dirección Xeral de Policía, dependente do Ministerio do Interior, á dotación de 10 Policías, 2 Oficiais e 5 Subinspectores, neste proceso.
2.- Instar á Dirección Xeral de Policía a crear de inmediato unha UPR, coma no resto de provincias galegas.
3.- Dar traslado do presente acordo tanto á Dirección Xeral de Policía como ao Ministerio de Interior