A subdelegada do Goberno, Isabel Rodríguez, participou en Ferrol na entrega dos premios 10 de marzo que concede CCOO, un deles ao ex alcade de Viveiro, Melchor Roel

Ferrol 10-3-19. Isabel Rodríguez expresou a súa satisfacción pola entrega dun dos galardóns, a título póstumo, ao que fora alcalde de Viveiro Melchor Roel Rivas e destacou que se trata dun recoñecemento moi merecido pola súa traxectoria vital, sindical e política, na que sempre se significou pola súa defensa dos valores da igualdade e a solidariedade.

A viúva de Melchor Roel, Carmen López Saavedra, que recolleu o premio, consistente nunha escultura, das mans do secretario xeral de Comisións Obreiras de Galicia, Ramón Sarniento, agradeceu no nome da familia esta homenaxe tributada ao que fora alcalde de Viveiro entre 2003 e 2013, ademais de sindicalista de CCOO.

Os outros premiados nesta edición dos galardóns 10 de marzo de CCOO foron Hortensia Álvarez Folgar e Xan López Facal.

No acto tamén tomaron parte os alcaldes de Viveiro, María Loureiro, e de Ferrol, Jorge Suárez, ademais dos dirixentes do sindicato Unai Sordo, secretario xeral da Confederación Sindical de CCOO; e Aurea Vázquez, secretaria xeral da Unión Comarcal de Ferrol.