O alcalde da localidade, Javier Castiñeira, acompañado do delegado territorial da Xunta, José Manuel Balseiro, mantiveron un encontro coa dirección do centro e representantes da asociación de nais e pais na que explicaron a situación deste proxecto.
A Xunta, que xa solicitou a licenza municipal, prevé licitar os traballos na primeira quincena de maio e executar as obras durante o verán, para non interferir na actividade ordinaria do centro. A achega autonómica está vinculada aos recursos adicionais que a Xunta dispón grazas ao obter superávit orzamentario.
Remodelación integral: mellora enerxética e funcional
As actuacións programadas están dirixidas a mellorar a eficiencia enerxética e a funcionalidade do colexio e neste senso inclúen obras nas fachadas, carpintería exterior e interior, sistema eléctrico e de iluminación e mellora das aulas e espazos adminsitrativos.
Así por exemplo contempla a renovación das xanelas, mediante a colocación de vidro illante (UVA), é dicir, dobre acristalamento con cámara de aire intermedia. Incluirá a substitución das caixas de persianas e tamén a mellora das portas interiores e exteriores.
O proxecto tamén prevé o illamento de fachada no edificio novo e a substitución da cuberta neste mesmo edificio, xa que no primitivo renovouse a cuberta hai poucos anos.
A Xunta inclúe tamén a substitución de luminarias por equipos LED, con regulación lumínica e detectores de presenza nas zonas comúns e a reparación e pintado de paramentos interiores
Mellora da accesibilidade e novo espazo de xogo cuberto
Proxectarase un novo ascensor e un sistema de ramplas entre os edificios que permitirá eliminar as barreiras arquitectónicas existentes na actualidade, e un amplo soportal que ampara non soamente ese paso desenvolto en ramplas, senón un maior que achegará ao Colexio un novo espazo de xogo cuberto, moi necesario para os días de climatoloxía adversa. Xa no interior executaranse outras melloras dirixidas ao bo funcionamento do centro como a reforma dos aseos.
Outra reforma significativa será o intercambio de localización entre o comedor e a cociña. Coa recolocación do comedor, no que por ocupación, deberían existir dúas portas que nos conduzan a dúas saídas diferenciadas, o mesmo sería moito máis seguro coa porta principal aberta ao vestíbulo central do edificio e unha secundaria, aberta ao novo núcleo de escaleiras.
Coa rehabilitación proxectada incrementarase a superficie total edificada en 349 m2 (402 m2 que se aumentan e 53 m2 que se retiran), ampliando a ocupación debido ao novo soportal e ao núcleo vertical de escaleiras e ascensor.
Axilización
Castiñeira quixo agradecerlle á Xunta de Galicia que atendese con tanta rapidez a solicitude do Concello, pois este mesmo ano desde o Goberno local apuntaron a necesidade de acometer esta renovación integral do centro. Ao mesmo tempo o alcalde comprometeuse a axilizar ao máximo os trámites que dependen do Concello que permitirán contar cun colexio máis moderno e funcional e cunhas instalacións totalmente renovadas.
O alcalde tamén salientou que esta non é a única mostra do Goberno galego e local que reafirman a súa aposta por unha educación de calidade e por espazos públicos máis modernos e confortables para o conxunto da comunidade escolar e, nese senso, sinala que tamén está previsto acometer a ampliación do instituto de Foz (salón de actos) para o que se reservan 300.000 euros.