No novo material informativo, que está dispoñible na páxina web e nas oficinas de turismo da comarca, proponse ao visitante coñecer a riqueza patrimonial, natural e gastronómica a través da proximidade e sabedoría dos artesáns da Mariña Lucense, principais protagonistas desta iniciativa.
A nova proposta consta dunha serie de itinerarios nos que o visitante pode adentrarse no oficio do artesán e disfrutar dos valores naturais, culturais e gastronómicos da localidade onde se ubican e da súa contorna próxima. Así, os visitantes poden realizar as Rutas de Artesanía de forma autónoma guiándose polas recomendacións facilitadas na nova guía ou solicitar o servizo con guía a algunha axencia, como é o caso de Mariña Activa, que se encargou da man da Mancomunidade do desenvolvemento desta nova proposta.
As xornadas de portas abertas das Rutas de Artesanía da Mariña Lucense teñen por finalidade dar a coñecer con actividades gratuítas para o público xeral esta iniciativa. As xornadas deron comezo onte en Cervo coa visita ao asteleiro de carpintería de ribeira de Francisco Fra e ao Museo Provincial do Mar. Na xornada participaron un total de 15 persoas de distintas procedencias como Asturias, Madrid, A Terra Chá e da propia comarca da Mariña Lucense. As persoas participantes trasladaron a súa satisfacción á organización polo positivo da iniciativa, xa que da man de Francisco Fra e das guías do Museo Provincial do Mar (Amelia e Ángeles) puideron coñecer en detalle e dunha forma moi amena e interactiva o proceso de fabricación dun barco de madeira, a historia e cultura mariñeira non só de San Cibrao, senon tamén da bisbarra en xeral, entre outras anécdotas e curiosidades.
As xornadas de portas abertas continúan os próximos fins de semana de xuño en Mondoñedo, A Pontenova, Viveiro e Burela. As actividades serán gratuítas e incluirán a visita a un ou dous obradoiros e unha actividade complementaria. A iniciativa, que busca ofrecer un motivo interesante polo que desplazarse ao territorio antes da tempada alta está dirixida tanto a locais que desexen coñecer mais sobre os recursos da zona como a visitantes que queiran vivir unha xornada diferente da man dos artesáns da Mariña Lucense.
O 22 de xuño será a quenda para Mondoñedo co alfar, unha visita guiada ao centro histórico da cidade e ao canteiro pola tarde. O domingo 23 tocaralle á Pontenova coa visita ao taller dun ferreiro, á antiga estación de tren, que hoxe en día acolle a Aula de Interpretación da Pesca e aos fornos de Vilaoudriz. O sábado 29 seguirán estas xornadas de portas abertas en Viveiro coa visita a dous ceramistas –un pola mañá e outro pola tarde- e unha visita guiada ao centro histórico. Viveiro pasaralle o testigo a Burela, que cerrará as xornadas o 30 de xuño cunha visita ás redeiras e ao barco museo boniteiro Reina del Carmen.
A continuación indícanse as datas cos horarios aproximados:
Mondoñedo 22-06
Alfar 10:30 – 11:30
Visita centro histórico 12:00 – 13:30-14h aprox.
Canteiro 17:00 – 18:00
A Pontenova 23-06
Ferreiro 10:30 – 12:00
Visita Aula Interpretación da Pesca e Fornos de Vilaoudriz 12:30 – 14:00 aprox.
Viveiro 29-06
Regal Cerámica 10:30 – 11:30
Visita centro histórico 12:00 – 13:30-14h aprox.
Miriam Cerámica 17:00 – 18:00
Burela 30-06
Redeiras 10:30 – 11:30
Barco Museo “Reina del Carmen” 12:00 – 13:00 aprox.
Para asistir a algunha destas citas cos artesáns da Mariña Lucense é necesario anotarse en turismo@amarinalucense.gal ou no teléfono 654089894. O aforo máximo é de 15 persoas por xornada.