No seu discurso, xa como rexedor que afronta o seu cuarto mandato, tivo palabras de agradecemento para “os que axudaron a deixar o listón tan alto como está” e dixo que “toca pensar en Ribadeo, na bisbarra, na provincia e tamén en Galiza enteira”.
Suárez Barcia manifestou que “seguiremos impulsando un crecemento sostible, produtivo e non especulativo. Seguiremos traballando duramente polas partes máis febles da sociedade. Queremos facer de Ribadeo a capital galega da produción orgánica e da alimentación sá… e todo isto cunha clara perspectiva de xénero”.
Ducias de veciñas, veciños e familiares dos membros da Corporación Municipal de Ribadeo quixeron acompañalos nesta sesión plenaria constituínte. Ao remate houbo tempo para as fotos.