O paro tivo lugar en dúas quendas, dende as once e media da mañán á unha media da tarde e dende as dúas até as catro da tarde. Durante ese tempo os traballadores, que se mantiveron nas instalacións da empresa, atenderon as explicacións do comité e de membros do sindicato CIG e decidiron as vindeiras medidas a tomar de seguir coa situación de retrasos nos pagamentos. Isto pasa por convocatorias de folga tódolos meses até que a empresa se comprometa a ingresar a nómina “cando menos antes do día quince de cada mes, xa que o cumplimento estrito do convenio, que fixa os seis primeiros días do mes para pagar, semella moi difícil” aseguran dende o comité de empresa.
“Dende o comité non quixeramos ter chegado a esta situación. Levamos moito tempo así e a xente xá vai cansada de incumprimentos por parte da empresa. Os recibos chegan ao banco e nós temos que cumplir. Tivemos moita paciencia, a empresa sábeo ben, mais a paciencia estásenos a acabar e, diante da actitude da empresa temos que tomar medidas” advirten dende o comité.