O cociñeiro francés Samuel Ramos Giquel elabora no IES de Foz un menú típico da Bretaña

 Foz, 7 de novembro de 2019. O cociñeiro francés Samuel Ramos Giquel, que visita o IES de Foz desde este martes, elabora hoxe, xoves, no centro un menú típico da Bretaña. Durante a súa estancia de cinco días na Mariña o chef e propietario do restaurante Auberge Ty An Heol, en Pont Avent, está impartindo formación sobre cociña francesa ao alumnado e profesorado de Hostalería do IES focense e aproveita para coñecer a comarca, degustar a gastronomía típica da zona e visitar empresas relacionadas co sector, como a produtora de ostras Acueo, en Castropol, a explotación ribadense de agricultura ecolóxica Finca As Fadegas e a lonxa de Burela.
O menú bretón que o cociñeiro francés prepara hoxe no IES de Foz está composto polos seguintes pratos: velouté de mexillóns con verduras ao azafrán; solombo de porco con fricassée de mazá e cebola á sidra con puré de patacas; e tartaleta de trigo sarraceno con mazás ao caramelo e manteiga salgada.
Samuel Ramos ten formación tanto en cociña como en xestión de empresas hostaleiras e leva máis de vinte anos traballando no sector, tanto en sala como en cociña. É membro da Alliance Slowfood de cociñeiros en Francia, que promoven unha cociña local, ecolóxica e baseada na produción local. No seu restaurante os seus pratos adáptanse ás estacións e os seus produtos proveñen de produtores locais directamente.
A colaboración deste cociñeiro francés co IES de Foz xurdiu grazas ao programa Erasmus+, xa que no restaurante de Samuel Ramos realizou as súas prácticas durante tres meses un alumno de Cociña do centro focense, Ayoub Elkamel.