Os exemplares repartiranse como agasallo de Nadal ás nenas e nenos do centro municipal co fin de que “desde as idades máis novas teñan nas súas mans, dun xeito didáctico e divertido, algúns dos lugares máis fermosos de Lugo”, explica a deputada.
Nos libros poderán darlle cor a lugares que lles resultarán familiares, como a praza da catedral de Mondoñedo, a praia de Augas Santas de Ribadeo ou o porto de Burela. E tamén poderán achegarse á muralla romana de Lugo ou aos Ancares.
A concelleira barreirense de educación, Montse Porteiro, agradece a colaboración da institución provincial e remarca a importancia de pór en valor o patrimonio desde as idades máis novas, incidindo en que por medio das nenas e nenos estes lugares tamén chegarán ás persoas adultas coas que poden compartir ese tempo de lecer, aprendendo mentres xogan a colorear.
Estes exemplares tamén serán repartidos polo concello a xeito de premio nos distintos eventos culturais que se celebren no municipio, co fin de que cheguen a todas as familias posibles e poidan servir tamén de escaparate para a provincia.
Pases gratutítos para o XuvenLugo
A área de mocidade da deputación que dirixe Mónica Rancaño tamén fixo entrega ao Concello de Barreiros dun lote de pases gratuítos a XuvenLugo, que se distribuirán nos diferentes actos de Nadal organizados pola concellería de dinamización. Dani García, concelleiro de dinamización, manifesta que “é un xeito de aproveitar os recursos públicos que se invisten nese evento e que chegue tamén a lugares máis distantes, como pode ser Barreiros. Así, as nenas e nenos que participen nas actividades de Nadal do concello poderán ter un pase gratuíto a este evento no que as distintas administracións colaboran.”
O XuvenLugo é unha feira de lecer familiar que se vén celebrando en Lugo desde hai máis de vinte anos no Pazo de Feiras e Exposicións de Lugo, que se está a desenvolver en horario de tarde, desde as 16:30 até as 20:30 horas, entre os días 5 de decembro e 7 de xaneiro.
O recinto inclúe unha sección dedicada exclusivamente aos nenos de 0 a 3 anos, tamén ludoteca, inchables, unha zona de xogos recreativos, atraccións mecánicas, unha pista de minigolf, outra de slot, unha pista multiaventura, o touro mecánico e o rocódromo, entre outros atractivos para os nenos.