Este faladoiro, enmarcado na efeméride de celebración do medio século de vida do Museo Provincial do Mar, tratará sobre distintos aspectos relacionados co mar, fonte vital e espiritual das xentes da Mariña deste tempo inmemorial. Nas intervencións introdutorias cada un dos cronistas falará de actividades, mitos e curiosidades relacionadas co mar e a seguir terá lugar un faladoiro coa participación do público asistente ao acto. (+ iNFO)
Carlos Nuevo. Cronista oficial de Viveiro desde decembro de 2004.
Profesor, historiador, presidente do Seminario de Estudos Terra de Viveiro dende a súa fundación. Pertence ao departamento de estudos locais do Consello da Cultura Galega. Colaborador habitual de prensa, radio, congresos e xornadas arredor da memoria histórica e a represión, coordinador e autor de numerosos artigos e publicacións de carácter histórico e biográfico.
Eduardo Gutiérrez. Cronista oficial de Ribadeo desde maio de 2016.
Profesor, historiador e alcalde de Ribadeo entre 1987 e 1995. Pertence á Asociación Internacional de Estudios Galegos. Fundou e dirixiu a Asociación Cultural Francisco Lanza e a Federación de Asociacións Culturais Galegas. Director teatral, conferenciante, autor de numerosos artigos e ensaios arredor de diversos temas políticos e de historia local.
Antonio Reigosa. Cronista oficial de Mondoñedo desde xaneiro de 2015.
Responsable de Comunicación e Xestión Cultural da Rede Museística da Deputación de Lugo. Escritor, investigador e divulgador da mitoloxía popular, da literatura de tradición oral e da cultura oral, autor ou coautor de numerosos artigos e libros de literatura infanto-xuvenil, literatura oral e mitoloxía popular. Creador e coordinador da enciclopedia virtual Galicia Encantada: galiciaencantada.com.