Foz, 14 de febreiro, 2020. Este venres celebrouse no Colexio Martínez Otero de Foz, con numerosas actividades adaptadas aos diferentes niveis, a “Festa da Solidariedade”. Nesta celebración, que para o colexio é cada día do ano, preténdese sensibilizar á comunidade educativa sobre un problema que golpea con forza no mundo como é a falta de alimento. Deste xeito, e con esta celebración, téntase recadar fondos para colaborar con proxectos que Mans Unidas ten abertos en diversos países do terceiro mundo. Como reza un dos carteis da campaña, “o mundo non necesita máis comida e si máis xente comprometida”.
Así, entre as 13h30 e as 14h30 deste venres, tivo lugar o reparto, e consumición, do “bocata solidario”, que os membros da comunidade educativa, que así o desexaron, mercaron a razón de 3,5€. Acto seguido, comezou a “Rifa solidaria”. Cada bocadillo consumido dá dereito a participar nunha rifa na que se sortean 60 lotes de produtos doados por diferentes entidades.
