Otero lembrou na súa intervención que “a primeira responsabilidade que tivemos que afrontar esta Executiva foi a convocatoria ás eleccións do 10 de novembro, co fin de manter a representación parlamentaria por Lugo e que permitise así, a elección do terceiro presidente socialista desde a recuperación da democracia. Polo tanto, seguimos así coa recuperación social, coa limpeza da vida pública e o novo proxecto de país ao que o Partido Socialista deu comezo en xuño de 2018 co desaloxo democrático do PP de Rajoy do Goberno”.
Explicou ademais que a convocatoria electoral celebrouse “nun contexto político singular debido ao cansazo provocado pola repetición electoral, como o demostra o incremento da abstención no conxunto xeral do país e particularmente en Galicia, e tamén na nosa provincia. A esquerda abstívose máis que a dereita, aínda que non de xeito tan substancial como para modificar o escenario resultante das eleccións”.
Temos que seguir traballando
Otero convidou a toda a militancia a seguir traballando.”Si conseguimos que os que se abstiveron o 10 de novembro, volvan confiar na nosa forza nas eleccións autonómicas, prestariamos unha contribución moi valiosa para desaloxar a Feijóo da Xunta, e liquidar así esta década negra de gobernos da dereita para Galicia, e situar a Gonzalo Caballero como Presidente de todos os galegos”
A secretaria provincial explicou “estamos en condicións de capitalizar o cambio de rumbo da política española liderado polo Partido Socialista, como xa se fixo a partir da Moción de censura: en menos de ano e medio.Cun Goberno moi precario nos seus apoios, fomos capaces de medrar 3 millóns de votos e practicamente 40 escanos no Congreso dos Deputados, recuperando a condición de primeira forza política do país e abrindo unha gran brecha coa dereita”.
“Non nós dobrarán”
A Secretaria provincial advertiu do clima de confrontación da política galega. “Atopámonos ante unha enorme expectativa de cambio en Galicia, pese a que redobrarán as ofensivas para impedilo; e intentarán que unha parte do electorado que quere o cambio, e que nos dará a maioría, quede na casa. Estano facendo dirixindo os seus ataques contra os socialistas galegos e contra o noso candidato. Non nos desanimarán nin o dobrarán, asegúrovolo”, espetou.
“Xa o están facendo cunha irresponsable campaña contra o Goberno de Pedro Sánchez. Durante 7 anos permaneceron nun silencio de vasallos ante Rajoy, pero agora de súpeto, quéreno todo e para xa mesmo. Feijóo e o PP son xogadores de vantaxe que non dubidan en recorrer á rifa permanente e á mentira para desvirtuar o xogo democrático e intentar castigar ao adversario. Nada lles para porque creen que Galicia lles pertence”, insistiu.
Otero tamén fixo alusión á previsible carreira madrileña de Feijóo. “É un subordinado de Pablo Casado e non vai poder ocultalo. A radicalización da dereita española, que corre apresurada detrás da extrema dereita, pero que casa mal coa pretensión centrista de Feijóo ao que xa se lle está vendo o plumeiro. Non pode pretender ir de autonomista cando o seu partido desde a rúa Génova defende a recentralización; non pode ir de avanzado cando o PP de Casado e Álvarez de Toledo amparan as posicións máis conservadoras; e non pode ir de moderado cando os seus colegas pactan e sométense ás pretensións da extrema dereita”.
A secretaria provincial emprazou a toda a militancia a traballar a reo nas vindeiras datas. “Estamos ante a nosa oportunidade, e pídovos que nos próximos meses, o esforzo de mobilización sexa máis intenso que nunca. Pídovos que busquemos voto a voto. Pídovos que non nos distraian nada, que manteñamos a máxima cohesión, que non perdamos o tempo en nada que non sexa sumar apoios para abrir unha lexislatura de cambios para Galicia”.
8 encontros comarcais por toda a provincia
Ao longo da súa comparecencia Otero deu conta do traballo realizado nas comarcas da provincia. “Durante a precampaña electoral realizamos encontros con todos os responsables do partido, a través de ata 8 encontros comarcais por toda a provincia. Non só falamos de eleccións, intercambiamos ideas e puntos de vista políticos con responsables orgánicos, alcaldes e concelleiros. Hoxe coñezo mellor á organización que dirixo, porque coñezo mellor o que pensan e o que queren os seus responsables ao longo de toda a provincia”.
Traballo dos Alcaldes e da Deputación
Otero amosouse moi orgullosa do traballo que se esta realizando dende os concellos socialistas e dende a Deputación de Lugo. “Estou moi satisfeita do grado de coordinación e da sintonía que alcanzamos co noso Presidente provincial. José Tomé, e con todo o seu equipo. E gustaríame poñer en valor ao noso alcaldes. Temos moitos e son moi capaces. Un partido municipalista como o noso ten nos seus alcaldes o alimento que lle mantén vivo e o fai máis forte. Por último, tamén quero remarcar o traballo que realizan os voceiros que traballan nos Concellos onde non gobernamos, fanno dende unha oposicion coherente, sentata e útil”, resumiu.