“Neste pleno volvemos ao de sempre na Deputación desde que está este goberno; de novo, socialistas e nacionalistas acolléronse á crítica a outras administracións para xustificar que a Deputación non teña posto ata o de agora nin un só euro para paliar as consecuencias da gravísima crise sanitaria provocada polo coronavirus”. O portavoz popular destacou que mentres a Deputación non dedicou recursos a facer fronte a crise, o Concello de Monforte, presidido tamén por José Tomé, si mercou equipos para protección persoal fronte ao virus.
Para Castiñeira é incomprensible que o goberno provincial alegue que non pode incrementar en 700.000 euros o importe do Plan Único para que sume 22 millóns, porque, segundo sosteñen socialistas e nacionalistas, suporía vulnerar a regra de gasto. Castiñeira mostrouse convencido de que dita regra será vulnerada este ano como o foi no 2019. Apuntou entre outras cantidades ás que é preciso abonar a Tragsa porque asumiu o persoal e as tarefas que facía Suplusa antes da súa disolución.
O mesmo representante do PP declarou tamén: “Os concellos terán que elixir entre dedicar cartos a inversións ou atender as necesidades xeradas pola crise sanitaria. Isto quere dicir que verán reducidos os cartos, por exemplo, para obras, o que redundará en maiores dificultades para combater os problemas de emprego que vai xerar a crise”.
A negativa, dixo Castiñeira, a ampliar os prazos que se fixan aos concellos para a tramitación, vai dificultar moito esta tarefa, especialmente aos máis pequenos, que, se sempre teñen pouco persoal, nesta ocasión aínda terán máis dificultades polas necesarias medidas para evitar contaxios. Complicacións suporán tamén para os concellos os cambios con respecto ao uso das baixas producidas en contratacións e as solicitudes de prórrogas.