Castiñeira sinala: “Unha vez máis defenderemos na Deputación unha moción que ten por obxectivo conseguir que o Goberno nacional adopte as medidas necesarias para garantir o futuro de Alcoa-San Cibrao, que é unha empresa absolutamente fundamental no tecido industrial de Lugo”. Na moción proponse ao pleno a adopción de acordo para instar ao Goberno a que aprobe o estatuto electrointensivo, que recolla as alegacións consensuadas entre Xunta, patronal e sindicatos, de maneira que fixe un prezo eléctrico estable e competitivo, que permita a Alcoa-San Cibrao estar en igualdade de condicións ás do resto dos países europeos. O Goberno presidido por Pedro Sánchez ten que adoptar as medidas necesarias para evitar o desmantelamento desta industria, de maneira que permita a Alcoa – San Cibrao operar nun escenario de certeza para garantir a súa competitividade e manter os empregos. A proposta de acordo inclúe instar ao Goberno a convocar de inmediato a chamada Mesa de Alcoa.
O portavoz popular pide aos socialistas que “deixen de enganar aos traballadores e aos veciños” e di que o Goberno practica unha transición enerxética fundamentalista, que, entre outras cousas, provocou o peche de Endesa-As Pontes. Cre que moitas decisións do Goberno constitúen “un ataque á industria galega”.
Igualmente, a moción popular inclúe unha declaración do propio pleno da Deputación na que expón “a súa decidida vontade de defender o emprego en Alcoa – San Cibrao e o apoio aos seus traballadores, aos das empresas auxiliares (en particular aos afectados polas solicitudes de E.R.T.E.) e aos dos contratados por medio de E.T.T. afectados pola baixa da produción”. Ademais, se a proposta popular sae adiante, solicitarase da empresa que cumpra os acordos, anteriores á crise provocada polo Covid -19, referentes aos traballadores contratados a través das E.T.T.
O portavoz popular, Javier Castiñeira, recorda que o PP levou en todo momento a iniciativa política en defensa de Alcoa-San Cibrao. “O PSOE, como ocorre en moitos outros asuntos, chegou tarde e sempre con xestos baleiros de contido, porque os socialistas lucenses son incapaces de esixir de Pedro Sánchez que tome as medidas necesarias para garantir o futuro desta industria, e esas medidas resúmense nun estatuto electrointensivo no que se recollan as alegacións dos sindicatos e da Xunta, para crear un marco estable de prezos asequibles da enerxía eléctrica, que lle permitan competir en igualdade de condicións”. Engadiu: “O Goberno fai oídos xordos ao que se lle di e a situación de Alcoa é cada día máis comprometida, máis difícil”.
Castiñeira lembra que o pasado 23 de abril o grupo do PP foi o primeiro en falar co presidente do comité de empresa de Alcoa – San Cibrao e poñer enriba da mesa o afondamento dos problemas desta industria que afectan directamente aos traballadores das E.T.T. motivados pola falta dun estatuto para os consumidores electrointensivos e pola baixa produción derivada da crise provocada polo Covid -19. Igualmente destaca: “Posteriormente, mantivemos unha xuntanza cos representantes da plataforma dos traballadores das empresas auxiliares que nos mostraron a súa profunda preocupación, logo do anuncio realizado pola multinacional e que inclúe a parálise das cubas que xa están a piques de rematar a súa vida útil, sen que se lles realice a rebrascaxe para o seu posterior arranque; é unha medida que implica unha redución considerable na produción e, polo tanto, supón un aumento no risco de peche da planta de San Cibrao. Engadiu: “Chama a atención ver agora (onte) aos socialistas cos representantes dos traballadores; outra vez chegan tarde, mal e arrastro”.