Segundo os nacionalistas, á falta dun mes para a celebración do Mercado Medieval, o concello de Mondoñedo aínda non anunciou de forma definitiva se vai celebrar ou non este evento, e consideran por responsabilidade social e sanitaria que o concello debería suspender este ano o mercado pola imposibilidade garantir unhas condicións mínimas de seguridade sanitaria a veciños e visitantes que acudan a este festexo.
“Non sabemos a que xoga o goberno de Mondoñedo, mentres concellos da comarca como Lourenzá, Ribadeo ou Foz xa fai días que anunciaron a suspensión das súas festas estivais, aquí aínda se anda especulando con celebralo de forma máis descentralizada polas diferentes rúas do casco”.
O BNG critica que o concello permaneza calado mentres festas como a da Maruxaina en San Cibrao, que coincide o mesmo día que a medieval de Mondoñedo, estea suspendida desde primeiros de xuño así que pídelle ao alcalde valentía para tomar a decisión de cancelar os tres días de mercado como medida de prevención fronte ao COVID-19.
“A medida é dura pero por moito que nos doa, a imposibilidade de controlar a afluencia de xente nunha festa como esta fai que pensemos que a decisión máis acertada sexa a de suspender o Mercado Medieval deste ano”.