Tralo anuncio por parte da área de Medio Rural da primeira convocatoria dun programa dotado de 60.000 euros para o mantemento de faixas secundarias de biomasa, Castiñeira sinala que “a Xunta achega 50 veces máis que a Deputación aos concellos lucenses en materia de prevención de incendios forestais. Só a través dos convenios directos cos Concellos, o Executivo autonómico dirixe nesta anualidade á nosa provincia un total de 3 millóns de euros para financiar a contratación de 400 traballadores que constitúen as brigadas municipais”, explica.
O voceiro popular considera que “dentro das súas competencias de apoio aos pequenos concellos, o desenvolvemento deste ou outro tipo de programas por parte da institución provincial son positivos”; pero lamenta que “cando se acorda de colaborar na loita contra os lumes, o faga cunha cantidade manifestamente insuficiente” ao ter repartir 60.000 euros entre os 67 concellos da provincia.
Por outra banda, Castiñeira considera “curioso” que sexa unha concelleira de Ribadeo a que critique á Xunta cando “precisamente o goberno local ribadense ten renunciado ao apoio do Goberno galego para a contratación de brigadas municipais”.