Do nivel de implicación de todas as partes dependerá que se acade este obxectivo. É preciso respectar as negociacións entre empresas, pero Alcoa debe ser consciente de que debe achegar posicións con Liberty para formalizar o acordo de compra-venda, buscando puntos de encontro e arranxando as cuestións que dificultan o peche da operación.
A Xunta mostrou de novo o seu compromiso de colaborar, da man do Goberno central, para poñer sobre a mesa os mecanismos de financiamento cos que conta para permitir que Liberty House poida desenvolver o seu plan industrial. Ao mesmo tempo, é preciso que o Goberno tamén avance na aprobación de medidas necesarias para garantir un marco enerxético estable e competitivo para toda a industria electrointensiva galega e os 5.000 empregos asociados.