O Concello de Mondoñedo reclama á Deputación que amplíe o arranxo da estrada LU-P-3103, entre Lindín e Santa María Maior

 Mondoñedo, 03 de novembro de 2020. As obras iniciadas hoxe pola Deputación na estrada LU-P-3103, en Mondoñedo, son totalmente insuficientes, á vista do mal estado en que se atopan distintos tramos desta vía. O pleno do Concello de Mondoñedo aprobou por unanimidade, o pasado sábado, solicitar do organismo provincial que prosiga co arranxo da vía, porque o que está programado é totalmente insuficiente.

O mal estado do firme é causa de numerosas queixas dos usuarios desta vía, que une a parroquia de Lindín coa de Santa María Maior, e dá acceso á LU-124.

O Concello mindoniense insta á Deputación a acometer a mellora completa desta vía e tamén doutras de titularidade provincial que igualmente necesitan reparacións sen máis demora.

O mal estado das estradas provinciais foi motivo de varias iniciativas do grupo provincial do PP nas últimas semanas, que chegou a reclamar do presidente, José Tomé, que renuncie a desempeñar ao mesmo tempo a área de Xestión Territorial.