O delegado territorial da Xunta en Lugo, Javier Arias, lembrou que o Instituto Galego de Promoción Económica (Igape) continúa avaliando as solicitudes recibidas ao abeiro desta convocatoria -xa pechada-, posta en marcha en colaboración coas sociedades de garantía recíproca (SGRs) e as entidades financeiras co obxectivo de mobilizar, no seu conxunto, 300 millóns de euros en toda Galicia.
En concreto, na comarca mariñá xa se comprometeron axudas para 99 solicitantes, que facilitan préstamos por importe de 5.266.238 euros. O importe do préstamo que se avala oscila entre os 3.000 euros e os 200.000 euros, e o Igape subvenciona o 100% dos xuros. Entre os beneficiarios destacan negocios dedicados ao sector da hostalería e o comercio, pero tamén relacionados coa construción, o transporte, academias de ensino e outros servizos.
Arias lembrou que esta é unha das liñas activadas polo Goberno galego para reactivar a economía e atenuar o impacto da pandemia sanitaria, creada especificamente para que os pequenos empresarios poidan enfrontar as tensións de liquidez causadas por factores como a caída das vendas, interrupción da actividade, menor demanda, falta de subministracións ou rescisión de contratos.
O obxectivo é, por unha banda, conseguir que os autónomos e as pequenas e medianas empresas accedan ao crédito nunhas condicións preferentes que lles permitan atender as súas necesidades máis inmediatas -como o pagamento de salarios, de facturas, alugamentos ou impostos- e, por outra, mobilizar os avais para a cobertura das operacións concedidas polas entidades financeiras e conceder reavais ás sociedades de garantía recíproca que as avalan.
Préstamos directos
O delegado territorial comunicou que ata o 31 de decembro está aberto o prazo para solicitar unha nova liña de préstamos directos do Igape, dotada con 10 millóns de euros, dirixida aos autónomos, microempresas e pemes con máis dificultades para acceder ao crédito privado debido á súa especial vulnerabilidade na situación xerada pola pandemia.
A nova liña de financiamento achegará créditos de entre 3000 e 500.000 euros por negocio, con xuros baixos e próximos ao 0% aos autónomos e as empresas que se dedican a ocupacións como a economía social; o ocio nocturno e a hostalería; a industria cultural e de lecer; as que realizan a súa actividade principalmente no verán, como as orquestras; e as que non teñen un emprazamento único, como os feirantes, entre outros. Disporán dun prazo para a devolución de ata sete anos, nos que están incluídos tres de carencia.