Na xuntanza participaron representantes da Confederación de Empresarios de Lugo, a Federación Galega de Comercio, a Asociación Provincial de Empresarios da Construción, Asociación Provincial de Empresarios da Hostalería de Lugo, Asociación de Xóvenes Empresarios, Asociación de Mulleres Empresarias de Lugo, e os Colexios Profesionais de Economistas e de Xestores Administrativos.
Arias explicou que este segundo Plan de rescate está dotado con 75 millóns de euros e bota a andar coa convocatoria no DOG dos programas de axudas para traballadores autónomos e microempresas. O prazo de presentación de solicitudes abrirase mañá e será dun mes.
O plan completarase o luns coa publicación no DOG da outra liña específica para os sectores que viron interrompida a súa actividade pola pandemia.
O delegado sinalou que as liñas de axuda manteñen a estrutura do primeiro Plan de rescate, coa novidade de que o programa dirixido aos sectores máis afectados, aqueles que tiveron que pechar os seus negocios, suma á hostalería outros como os ximnasios, centros de ocio infantil ou as feiras. Outra das novidades a destacar é que excepcionalmente poderá eximirse aos interesados do requisito de estar ao corrente das obrigas tributarias no momento de formalizar a solicitude.
Datos primeira edición
Javier Arias trasladou que nese primeiro Plan de rescate concedéronse 3.811 axudas na provincia de Lugo por un importe total de 8.238.150 euros, distribuídos entre os tres programas -compatibles entre si, ao igual que na presente edición-. As dúas primeiras liñas, para traballadores autónomos e para microempresas en xeral, acumularon o 89% do orzamento e máis do 82% das solicitudes.
En concreto, o Goberno galego concedeu 1.938 axudas a autónomos lucenses por unha contía global de 2.426.400 euros, e 1.212 axudas a microempresas da provincia, que suman achegas por importe de 4.909.000 euros.
Nova convocatoria
Os programas que hoxe se convocan contemplan apoios de distinta intensidade en función dos descensos experimentados no volume de facturación. No que respecta aos autónomos, con caídas de entre o 45% e o 60% recibirán unha contía de 1.200 euros; con máis do 60%, elevarase a 2.000 euros, e se alcanza ou excede o 70%, chegará ata os 3.000 euros.
As microempresas recibirán axudas de 4.000, 5.000 ou 6.000 euros segundo o tramo que lles corresponda en canto ás perdas por facturación, pero ademais sumarán 1.000 euros se teñen entre catro e nove traballadores; 2.000 se hai entre 10 e 20, e 3.000 se son entre 21 e 25 traballadores.
O obxectivo, apuntou o delegado territorial, “é contribuír ao sostemento da actividade económica, especialmente dos sectores que máis están a sufrir as consecuencias da emerxencia sanitaria; a resistencia do tecido empresarial resultará fundamental para o mantemento do emprego e facilitará a recuperación tras a pandemia”.