O deputado Jesús Novo sinala: “A recente reunión do Consello Provincial de Turismo demostrou unha vez máis que o actual formato non é o axeitado e cremos que precisa un cambio. Na reunión celebrada o xoves pasado, máis que a unha reunión na que se debía de tratar de turismo, ao que realmente asistimos foi a un mitin político a cargo da deputada da área”
Tamén declara Novo: “No PP solicitamos un cambio de formato, que poidamos participar todos. É certo que se nos deixa intervir, pero xa nos traen os deberes feitos, e o único que podemos facer é dicir se estamos ou non de acordo; as nosas opinións e propostas de pouco valen neste caso”.
Polo seu lado, o alcalde de Sober e presidente do Consorcio da Ribeira Sacra, Luís Fernández Guitián, sinala: “Está claro que o Consello Provincial de Turismo non pode funcionar tal e como está funcionando. Está sendo un órgano propagandístico do presidente da Deputación e do seu equipo. En realidade debía de tratarse dun ente consultivo e participativo, no que todos os membros puideran expresar as súas opinións e tiveran a oportunidade de rebater as opinións do propio grupo de goberno”.
Igualmente indica: “Tal como está funcionando non ten utilidade ningunha, como quedou claramente reflectido na última reunión. O presidente fixo unha exposición sen comunicar previamente a ninguén a documentación do que ía na orde do día. Está claro que os obxectivos dese órgano son outros e se segue funcionando tal como está o mellor é que se disolva porque non ten ningunha operatividade”.