O Presidente da Deputación de Lugo, José Tomé Roca, xunto á Deputada de Réxime Interior, Promoción do Territorio e Turismo, Pilar García Porto, o Deputado de Promoción Económica e Social, Pablo Rivera Capón, o Alcalde de Foz, Francisco Cajoto, o presidente da Confederación de Empresarios de Lugo, Jaime López, e o presidente da Federación de Comercio da Mariña, José Carlos Paleo, visitou esta tarde varios establecementos do concello focense adheridos á campaña de descontos da Deputación.
“Unha gran parte dos autónomos e das pequenas empresas atravesan momentos difíciles, sabémolo, por iso queremos axudar á súa recuperación con esta importante medida”, explicou o Presidente. “Os Bonos Impulso da Deputación son un incentivo para apoiar ás empresas e ás familias, promoven a actividade nas tendas de barrio e nos negocios de sempre, e axudan á concienciación da relevancia social que teñen no noso día a día”, incidiu Tomé Roca.
Este mércores xa hai 432 establecementos inscritos en toda a provincia para participar nos Bonos Impulso e na páxina web da institución provincial está habilitado un espazo no que, ata o 25 de maio, os propietarios de locais interesados en participar poderán adherirse cumprimentando un formulario sinxelo. Poden anotarse todos os negocios da provincia, incluídos os locais de hospedaxe e servizos, tendo en conta que non se poderá participar para canxear lotaría, bebidas alcohólicas non alimentarias nin tabaco.
Comarca da Terra Cha
Na comarca da Terra Cha os Bonos Impulso xerarán un volume de negocio de máis de 200.000€. Repartiranse preto de 2.300 bonos entre os concellos de Abadín, Begonte, Castro de Rei, Cospeito, Guitiriz, Meira, Muras, A Pastoriza, Pol, Vilalba e Xermade.
Tomé Roca explicou que “os Bonos Impulso nacen co propósito de que haxa actividade económica en todos e cada un dos 67 municipios que conforman a provincia, por iso cada persoa que teña un bono só o poderá gastar nos establecementos adheridos do seu municipio”. Haberá un reparto equitativo dos bonos en cada concello seguindo criterios obxectivos como a poboación, o número de persoas en situación de desemprego e o número de empresas dadas de alta no IAE (Imposto de Actividades Económicas). En base a iso, a Deputación establece un mínimo de 20 bonos para os concellos máis pequenos e un máximo de 5.000 para os máis grandes.
Adhesión dos establecementos
Non existe límite de establecementos, polo que todas as empresas e autónomos poderán participar. Estará habilitado o seguinte número de teléfono para calquera dúbida que poida xurdir 982.260.204 e o seguinte enderezo electrónico bonoimpulso@deputacionlugo.org.
Unha vez rematado o proceso de inscrición, a institución provincial publicará a listaxe de establecementos participantes e faralle chegar a cada local admitido un indicativo da súa adhesión no programa. Un cartel que deberá colocar nun lugar visible, facilitando así que a veciñanza saiba en que establecementos poderá canxear os Bonos Impulso.
Veciñanza
A Deputación porá a disposición da veciñanza da provincia un total de 17.000 Bonos Impulso. A súa solicitude realizarase unha vez remate a fase de adhesión dos establecementos, pero antes de que se abra o prazo, a institución provincial informará a través da súa páxina web, das redes sociais e dos medios de comunicación das datas e fórmulas para poder conseguir os Bonos Impulso. A súa asignación será por orde de presentación de solicitudes, respectando o número mínimo e máximo establecido de bonos por concello, e fixando nesta primeira fase de asignación un máximo dun bono por persoa.
Poderán solicitar un Bono Impulso as persoas maiores de 18 anos que residan ou estean empadroados nalgún dos 67 concellos da provincia. As persoas beneficiarias recibirán na súa casa a través de correo postal o seu Bono Impulso, que poderán utilizar como método de pagamento nun único establecemento. Este bono será nominativo, é dicir, levara o nome e apelidos de cada persoa, o que permitirá identificalo no momento da compra. O prazo para a canxear os bonos rematará o 31 de agosto.
Os únicos gastos que non se consideran subvencionables serán as bebidas alcohólicas non alimentarias, tabaco e lotarías, deixando de manifesto que tanto a hostalería (incluídos os servizos de aloxamento) como estancos, poderán participar xa que ofertan máis produtos no seu establecemento.
De non esgotarse todos os bonos nesta primeira fase de solicitude, a Deputación de Lugo habilitará novos prazos e realizará sorteos entre aqueles cidadáns interesados en participar no programa.
Dixitalización das PEMES
Os establecementos que se adhiran ao programa poderán participar nun proxecto integrado dentro das medidas do Plan Impulso da Deputación de Lugo a través do que se mellorará a xestión, a dixitalización e a visibilidade social do negocio de forma gratuíta. A institución provincial porá á disposición das PEMES e MICROPEMES, se así o aceptan, formación e novas destrezas que fagan máis competitivos os negocios da provincia.