A concelleira de Servizos Sociais e de Mar, Carmela López, promotora do proxecto, une ambas concellerías grazas ao mesmo, no que se fomenta o traballo en equipo de entidades de inclusión social e do sector pesqueiro: “hai varias actividades programadas, como obradoiros terapéuticos nos que se elaborarán produtos artesanais que terán como base do deseño as redes, tamén programas de sensibilización ambiental nos que se creará unha mostra itinerante e un obradoiro de creación artística que culminará co acondicionamento do muro da antiga conserveira de Burela, situado na entrada ao porto. Neste caso a través dun concurso preténdese crear unha obra de arte que engada valor á nosa vila”.
A Federación Galega de Confrarías e en especial a Confraría de Burela, a Fundación Expomar, a Asociación de Redeiras Cabo Burela, a Fundación Eu Son, a Asociación de Axuda ao enfermo mental da Mariña, a Asociación A Mariña Sen Plástico e o Concello de Burela están xuntos nun grupo de traballo que promove a inclusión social, a conexión co sector pesqueiro, a promoción turística da vila e que pretende consolidar unha sociedade máis educada ambientalmente, grazas ao proxecto Burela-In.