Ermida aclarou que o Concello de Barreiros non recibiu en ningún momento ningunha proposta relativa a fondos europeos e a única “proposta” recibida foi “a famosa regra dos terzos por parte dunha conselleira que dixo non querer facer política coas problemáticas do ciclo da auga.”
O convenio do 2010 que a Xunta non executou liberaba ao Concello de aportación económica.
A alcaldesa explica que o convenio do que fala a Directora de Augas de Galicia non recollía esa regra dos terzos e que non se executou porque o goberno municipal anterior non foi quen de obter aportación ás arcas públicas dos promotores. Naquel entón, o presidente Feijoo deixou claro que só se executaría se os promotores poñían cartos, asumindo a Xunta a parte do Concello, xa que asumía o 40%; a Deputación, o 20% e os promotores, outro 40%.
Con estes datos, que a Directora de Augas de Galicia pode contrastar co propio presidente da Xunta, Ana Ermida advirte aos populares de que “non poden dicir, e quedar con toda tranquilidade, que manteñen un convenio de hai 11 anos nos que o PP gobernou a Xunta e o Concello de Barreiros durante 9 deles e que quedou sen executar. Sen entrar a valorar as razóns de fondo de ter asinado aquel convenio que nunca chegou a realizarse”, afirmou.
Acusacións de mentiras e falta de respecto á representante municipal.
A rexedora tamén esixiu ao deputado popular José Manuel Balseiro un mínimo de educación e respecto cara quen representa á totalidade das veciñas e veciños de Barreiros. “Porque o deputado no Parlamento representa aos seus votantes, pero as alcaldesas e alcaldes representamos a todo un pobo, tras unhas eleccións municipais que gañamos”. Esixiulle así mesmo que retire as acusacións de mentir, xa que “poden deberse a un problema de comprensión lectora do deputado mariñao” e aclarou que ten “plena disposición a explicarlle cada unha das súas palabras e as declaracións feitas tras as distintas xuntanzas sobre o tema.”
Traballo serio do goberno municipal para realizar un proxecto que leva anos agardando.
A rexedora insiste en que o Concello traballa coa intención de sacar adiante este proxecto con axuda de quen sexa preciso; pero non imos deixar que a política do PP sitúe a responsabilidade de non ter executado o proxecto de hai máis dunha década no actual goberno. “A verdadeira falta de dilixencia é dun goberno da Xunta máis preocupado de dar vida a un Partido Popular na UCI en Barreiros ca de axudar a resolver un problema permanente da veciñanza neste concello”.
“Este goberno municipal seguirá traballando con quen teña intención de solucionar os problemas de Barreiros. Quen use os gobernos para facer burda política de desgaste, non merece nin un momento de atención por parte dos representantes de Barreiros”, asegurou Ermida; quen engadiu que “a veciñanza de Barreiros sabe que o goberno local non vai parar de buscar ata debaixo das pedras o finanzamento para a depuradora de San Miguel e se a Xunta prefire buscar escusas para non axudar, non logrará facernos desfalecer.”
Ana Ermida lamenta ademais que, en pleno período de consultas do Plan Hidrolóxico Galicia Costa aberto por Augas de Galicia, o departamento galego non incluíra esta depuradora como investimento prioritario. “Se tanta preocupación e interese teñen, o mínimo é recoller este investimento nos documentos cos que se traballa desde a Xunta para obter fondos”.
A alcaldesa anuncia que pedirán formalmente esta modificación, que xa foi trasladada como unha posibilidade tras a reunión mantida polo goberno municipal no Ministerio de Transición Ecolóxica hai ano e medio sen obter resposta da Xunta e ignorándoo á hora de elaborar o novo documento”.
A esta actitude, contraponse a participación da Xunta de Galicia noutras obras de saneamento ou abastecemento en concellos da súa mesma cor política, nas que financia o 80% do mesmo ou nalgúns casos o 100%. “Agardamos que o PP deixe de secuestrar as institucións que dirixe e actúe nelas con criterios obxectivos e de xustiza social e, se de verdade ten intención de solucionar o problema de depuración de San Miguel e Reinante e de Santiago de Reinante, abandone o fanatismo político e emprenda a vía da cooperación e a lealdade institucional.”