O rexedor declarou: “mañá, xoves, vamos izar as bandeiras azuis. Concedéronnos tres para as praias, que corresponden ás de A Marosa, Ril e Portelo, pero non podemos poñelas todas consecuentemente da dificultade enorme que temos para contratar socorristas porque non hai suficientes para todas as praias da Mariña. En Burela necesitaríamos dez e temos a metade exactamente. Polo tanto en principio vamos izar a bandeira azul na Marosa e no Portelo, mentres que na de Ril de momento non se vai poder facer, dado que non hai maneira de conseguir socorristas para ter nas tres praias”.
Para Alfredo Llano “é unha pena, pero isto fai pensar inmediatamente en que hai que ofrecer cursos de socorrismo para moita xente aquí, na Mariña, a través da Mancomunidade e dos propios concellos, para garantir que haxa xente titulada para o futuro. Se non vamos ter un grave problema para manter as bandeiras azuis e, sobre todo, os servizos de seguridade nas praias, que realmente é o que nos debe preocupar a todos”.
O alcalde bureles considera que “hai que pensar en facer máis cursos, pero tamén en contratar aos socorristas durante máis meses porque a Xunta de Galicia nos ofreceu a Burela 6 socorristas, cando normalmente viña ofrecendo 10, e antes eran para tres meses e agora para só dous meses. Isto é moi pouco motivador para que os rapaces e as rapazas intenten facer cursos deste tipo porque saben que teñen moi acoutado o tempo de traballo”.
Llano dixo que “aínda que non haxa socorristas suficientes si vai haber todos os servizos nas praias e vamos procurar ter todo ben ordenado da mellor maneira posible. Pero este ano creo que vai ser soamente en dúas praias onde vai haber bandeira azul e o servizo de seguridade a través dos socorristas”.
E engadiu: “mañá ás 13:30 horas izaremos a bandeira azul no Portelo e as 13:45 aproximadamente farémolo na Marosa”.