O delegado territorial da Xunta en Lugo, Javier Arias, comprobou esta tarde o desenvolvemento das probas no pavillón municipal de Ribadeo, onde avanzou que o Sergas programa cribados para a vindeira semana entre xente nova de Cervo e Burela, que actualmente tamén se atopan no nivel de risco alto pola incidencia do virus, así como na capital da provincia.
Arias fixo un chamamento á mocidade de entre 18 e 30 anos para que acudan de forma voluntaria a someterse á proba e lembrou que “controlar esta situación precisa da colaboración de todos, polo que debemos seguir actuando coa máxima cautela e respectando escrupulosamente as medidas sanitarias”.
O delegado puxo en valor unha vez máis o traballo dos profesionais sanitarios do Sergas e dos efectivos de emerxencias (Protección Civil, Cruz Vermella… ) que participan nestes cribados, que hoxe se desenvolven en Foz e Ribadeo e mañá sábado no pavillón municipal de Viveiro.