Durante a visita, Jacobo Rey puxo en valor a posta en marcha desta iniciativa, que leva funcionando desde o ano 2016 e que ao remate deste 2021 chegará a máis de 90 casas niño e ofrecerá preto de 500 prazas de atención infantil para nenas e nenos de 0 a 3 anos, 100% gratuítas para as familias.
As casas niño son un servizo de atención á infancia para os concellos do rural que ofrecen unha atención sen custo ningún para as familias, próxima e individualizada para os máis pequenos. Cada centro pode acoller ata a cinco nenos. Trátase dun programa pioneiro que ten como obxectivo dotar a todos os concellos de Galicia dun servizo de conciliación.
O Goberno galego continúa avanzando no seu obxectivo de adaptar as medidas autonómicas ás necesidades das diferentes familias. Para as que deciden vivir no rural, a través da creación de casas niño e casas do maior ou reducións fiscais para a compra de vivenda, e para todas as demais a través da gratuidade das escolas infantís para segundos fillos e sucesivos ou a Tarxeta Benvida, que axuda de xeito directo ás familias na compra de produtos básicos para os seus bebés.