A intervención, adxudicada á empresa CONSTRUCCIONES ISIDRO OTERO SL por un importe de máis de 48.000 euros, comezará nas vindeiras semanas e terá un prazo de 2 meses.
Trátase da rehabilitación do pavimento da estrada LU-163 en toda a súa lonxitude, desde o punto quilométrico 0+000 ao 1+830. A estrada LU-163 iníciase na LU-161, no núcleo urbano de Ferreira do Valadouro e finaliza na LU-162, en Budián.
Para resolver as carencias na capa de rodadura, realizarase unha repavimentación da calzada en toda a súa superficie, mediante un microaglomerado en frío para mellorar a súa adherencia e prolongar así a durabilidade do firme.
De forma previa á repavimentación, executarase unha limpeza e reperfilado das marxes da vía, con reapertura de cunetas e regularización superficial onde sexa necesario polo estado actual do firme.
A Xunta, a través da Axencia Galega de Infraestruturas, continúa traballando na conservación e mantemento da rede viaria autonómica co fin de proporcionarlles aos cidadáns unhas estradas cómodas e seguras.