O percorrido deste vehículo comeza na parroquia de Rúa, instalándose na Antiga Escola, e alí permanecerá durante 15 días; para logo ir rotando por diferentes puntos do municipio:
San Román (antiga escola)
A Senra (centro cívico)
Sargadelos (aparcamento CHA)
Castelo (lavadoiro)
Trasbar (capela)
Viladesuso e Espiñerido (casa Basanta)
Gondras- A Venta
Cuiña- Rueta
Daián- Figueirido
Tal e como explicaron o rexedor, Alfonso Villares, e a edil de Medio Ambiente, Mali Méndez, que se desprazaron ata a zona para ver en primeira persoa o funcionamento do novo equipamento ecolóxico, “o que pretendemos con este punto é facilitar á veciñanza a correcta reciclaxe de residuos domésticos (telefonos móbiles, lámpadas, cápsulas de café, pinturas e disolventes, sprays e aerosois, pilas, CD-DVD, cartuchos de tinta e de toner de impresora…) achegándolle este equipamento aos seus fogares, ao tempo en que seguimos incidindo na importancia de sensibilizarnos e de levar á práctica hábitos respectuosos co medio no noso día a día”.
Este novo equipamento vén completar o servizo do Punto Limpo Municipal situado no Polígono de Cuíña, cuxo horario de apertura ao público no verán é martes e xoves de 8:30 a 14:30 horas, e mércores de 15:00 a 20:00 horas.
Villares e Méndez recordaron que desde o Concello temos en marcha unha política de sensibilización ambiental que inclúe campañas como o “Coida Cervo”, un voluntariado de recollida de lixo a fin de poñer en valor as boas prácticas individuais no noso día a día no coidado e na protección da contorna; e agora este novo mini punto limpo pretende ser un novo piar desta política medioambiental, tanto no aspecto didáctico e de sensibilización, como no seu papel á hora de evitar a proliferación de puntos de vertido incontrolados nas contornas e espazos naturais.