Arias explicou a nova folla de ruta tras o plan acordado cos hostaleiros para o funcionamento durante os vindeiros meses -con independencia da situación epidemiolóxica-, que contempla a posibilidade de ampliar horarios segundo as medidas de prevención ante á covid-19 que asuman dentro dos dous niveis establecidos.
En ambos niveis un dos requisitos é contar cunha ventilación adecuada e con medidores da calidade de aire. Por iso, a Xunta publicará este mes unha liña de axudas dotada de 6 millóns de euros para que os establecementos hostaleiros e os aloxamentos da comunidade poidan adquirir equipamento poscovid coma estes medidores.
Esta liña forma parte dun paquete de axudas que inclúe outras tres convocatorias: unha para recursos tecnolóxicos e accións de promoción e dixitalización, outra para acondicionar as infraestruturas turísticas dos concellos de ata 10.000 habitantes, e un programa de apoios para as axencias de viaxe. En total, indicou Arias, estas iniciativas suman case 16 millóns de euros de orzamento.
O delegado visitou un dos establecementos de hostalería beneficiado pola orde para incentivar a mellora de terrazas e a venda a domicilio. Apuntou que, xunto cos dous Plans de rescate, o Goberno galego distribuíu no municipio 53.600 euros en 22 axudas nos últimos meses.