A Supercopa xogarase en Jerez

Burela, 25 de xaneiro, 2022. As Guerreiras defenderán o título de Supercopa de España no palacio municipal dos deportes de Jerez de la Frontera o 26-27 de febreiro. Pescados Rubén Burela FS -campión de Primeira RFEF Futsal Feminina e vencedor de Copa de S.M. A Raíña- e Futsi Atlético Navalcarnero -subcampión de Primeira RFEF Futsal Feminina-reencontraranse para decidir cal dos dous equipos se coroará como supercampión da tempada 2022.

A cita compartirá escenario coa Supercopa de España Masculina a última fin de semana de febreiro con Barça -campión da última edición de Primeira RFEF Futsal-, Movistar Inter -vencedor do Campionato de España/Copa de S.M. O Rey-, ElPozo Murcia Costa Cálida -primeiro clasificado ao termo da competición ligueira regular- e Palma Futsal -segundo clasificado ao termo da competición ligueira regular-, como protagonistas.

As mariñás, que se verán por primeira vez na tempada con Futsi este sábado na xornada 15 de liga, volverán medirse ás madrileñas en menos dun mes defendendo o galardón que custodian desde en 2019, impoñéndose en Las Rozas precisamente a Navalcarnero (2-6) e revalidado 2021 en Burela fronte a Poio Pescamar (2-0).