Castiñeira explica: “Dende a finca Villadangos, en Sabarei, no concello de O Corgo, o grupo provincial do Partido Popular quere anunciar que presentará unha moción no próximo pleno da Deputación de Lugo en apoio ao sector gandeiro, que se está vendo moi prexudicado polas decisións do Goberno de Pedro Sánchez, que están a levalo a unha situación económica moi complexa, cunha suba dos custos de produción e un Goberno que non apoia aos gandeiros”. Engade: “As declaracións do ministro de Consumo, o señor Alberto Garzón, son a gota que colma o vaso; unhas declaracións totalmente inxustas e temerarias, que van en prexuízo dos intereses dos nosos gandeiros, dos nosos excelentes gandeiros que producen unha excelente carne que se exporta a numerosos países”.
Os populares destacan que “os gandeiros españoles ven como membros do Goberno de España, do seu Goberno, non son capaces de apoiar os seus intereses; esiximos unha rectificación do Goberno e o facémolo dende unha explotación gandeira que é típica de Galicia, unha gandería media, moi similar ás produtoras de carne en Galicia, tamén moi similar ás do resto do Estado”. Destaca: “Facémolo aquí porque nesta explotación hai unha cabeza de vacún que está cualificada como o mellor exemplar de vaca de raza rubia galega no ano 2021, concretamente a vaca chamada Teixa; é unha mostra moi clara da carne que se produce na nosa provincia, no noso país”.
Castiñeira declara: “O Partido Popular non vai admitir esas declaracións por parte do ministro Garzón e pedimos ao Goberno unha rectificación e que o presidente Sánchez cese a este ministro, que non é a primeira vez que vai contra os intereses de toda a gandería do país”. No PP saben que o sector o está pasando moi mal, por esas decisións nefastas do Goberno central que van en contra dos intereses dos nosos gandeiros. O portavoz popular sinala: “ Sabemos que subiron os custos de produción, o que fai que as explotacións estean pasando agora un moi mal momento económico. Pedimos o apoio para a manifestación que se celebrará o próximo día 23 en Madrid”.
En definitiva, o que pide o PP é que “por parte da Deputación de Lugo se faga pública unha declaración institucional en apoio do sector gandeiro, en apoio da carne galega e lucense e que se fagan campañas para tratar de retomar esa grande fama que sempre tivo e que ten a carne de Galicia, a carne lucense, a pesares das manifestacións do ministro Alberto Garzón”.