Isabel Méndez afronta o cargo “cunha enorme ilusión e con moita responsabilidade”. A inmensa maioría de xerentes das asociacións de comerciantes das vilas e cidades de Galicia forman parte de AGAXECCA e a nova dirección asume o reto de representar a un colectivo profesional que presta servizo a un dos sectores con maior peso no PIB da comunidade autónoma. A presidenta defende que “a asociación debe ser un dos interlocutores de referencia para a Xunta de Galicia en torno a calquera cuestión que afecte ao comercio de proximidade” e xa solicitou unha reunión presencial coa Dirección Xeral de Comercio “para acadar as melloras que o sector nos demanda”.
Principais retos
As pequenas e medianas empresas que forman parte dos centros comerciais abertos e as zonas comerciais urbanas de Galicia seguen padecendo as graves consecuencias da crise económica derivada da pandemia. As xerencias coñecen de primeira man as necesidades dun sector particularmente castigado e desenvolveron un importante labor de mediación coa administración para tramitar axudas e deseñar estratexias de recuperación. Nos próximos anos, os principais retos de AGAXECCA pasan por avanzar na profesionalización do colectivo, servir de altofalante para as súas demandas e defender os milleiros de postos de traballo que dependen da pequena economía local.