Os socialistas sinalan que “das tres peticións de reunión da Mancomunidade de Concellos da Mariña para traballar de forma leal para a ubicación da planta, o silencio sempre foi a resposta. Silencio que tamén están a manter a presidenta provincial do Partido Popular en Lugo e tenente de alcalde de Mondoñedo Elena Candia, así como o voceiro da Deputación e exalcalde de Foz Javier Jorge Castiñeira, os alcaldes populares de Xove e Cervo Demetrio Salgueiro e Alfonso Villares e os restantes representantes locais dun Partido Popular que prometeu –e incumpriu- implantar na Mariña a factoría de fibra téxtil de Altri”.
Lembran que esta promesa “serviría para paliar a larga crise industrial da comarca e reverter en parte a nefasta política da Xunta nun sector que é única e exclusivamente da súa competencia. Seguimos sen interesarlle para nada á Xunta”, denuncian dende o PSdeG.
Queren saber “que pensan os representantes populares?”
“O engano desta volta foi maiúsculo, con repercusión non para anos, senón para décadas”. Por iso queren saber “que pensan os representantes populares?. Que opina Elena Candia? Parécelle ben que a planta que emprega eucalipto se ubique lonxe da materia prima?. Parécelle correcto que a Xunta abandone A Mariña?. Dálle igual que 2.500 postos de traballo desaparezan dun plumazo da comarca por obra e gracia de Feijóo, sen ningunha explicación?. Parécelle ben que nin sequera teñan a dignidade de reunirse coa comarca da Mariña despois de 3 peticións por escrito?”, preguntan. E Insisten nas súas criticas “isto é unha decisión política, que nola expliquen, porque nós non a entendemos pero tampouco a aceptamos”.
Alonxar o centro de produción da fibra téxtil dos eucaliptos vai ter repercusións económicas inmediatas nos propietarios forestais, que son numerosos veciños e veciñas da comarca. Alonxar a fábrica de Altri do eucalipto implica un maior custo de transporte, iso vaino a asumir o propietario do monte, venderemos a madeira máis barata e será “grazas” ao PP e a Feijóo.
Reunión hoxe en Viveiro
As alcaldesas, alcaldes e voceiros socialistas da Mariña mantiveron hoxe pola tarde unha reunión de traballo, diante da fabrica de Vestas de Viveiro para evidenciar o declive económico da Comarca, e na que acordaron os seguintes puntos con respecto a este proceso:
-Impulsar mocións en todos os plenarios dos Concellos para esixirlle á Xunta que cumpra o mandato do Parlamento Galego, aprobado no pleno do pasado 8 de febreiro. No que se di textualmente: “que se propicie o seu emprazamento na Comarca da Mariña”.
-Unha recollida de sinaturas nos distintos Concellos para que a Xunta mude a súa actitude, reciba aos representantes da comarca e cumpra o mandato do Parlamento.
-Realizar unha axenda de reunións con sindicatos, silvicultores, sector de transformación da madeira, así como do tecido empresarial da comarca para definir e programar accións a levar a cabo.
Os representantes socialistas da Mariña insisten en demandar explicacións e cumprir o acordado. Por todo isto reclaman, “respecto aos representantes públicos da Xunta de Galicia e solucións á grave crise industrial da nosa comarca. Agora xa non teñen a escusa do goberno central, agora é momento de feitos e non de propaganda. Esiximos respostas”, remarcan.